सल्यानमा दर्जन वढी पसलमा चोरी

सल्यान/सल्यानमा दर्जन बढी पसल, घर र विद्यालयमा चोरी भएको छ । जिल्लाको छत्रेश्वरी गाउँपालिका –१ दमाचौर बजारका आठ पसल, घर र विद्यालयमा शुक्रबार राती  अज्ञात समूहले एकैसाथ चोरी गरेको हो ।

दसैंको बेलामा घर तथा पसलमा कोही नभएको र सबै टीकाटाला तथा खानपानमा व्यस्त भएको मौका छोपी अज्ञात समूहले सामूहिक रुपमा चौरी भएको प्रहरीले  जनाएको छ ।

पसल तथा घरमा लगाएको ताला फोडी अज्ञात समूहले ३ लाख ११ हजार बराबरको नगद ,सुनका गहना, रिचार्ज कार्ड लगायत अन्य सामग्री चोरेर लगेका छन् । अज्ञात समूहले दमाचौर बजारका चुडामणी बस्नेतको मेडिकलको ताला फोडेर नगद रु  ५० हजार, केशब केसीको पसलबाट ४ हजारको रिचार्ज कार्ड, छत्रेश्वरी गाउँपालिका १ दमाचौरका वडा अध्यक्ष नेबबहादुर शाहको घरबाट १ लाख २० हजार बराबरको ढाई तोला सुन, चित्रजंग शाहको मेडिकलबाट ७९ हजार नगद १ लाख २० हजार बराबरको ढाई तोला सुन चोरी जिल्ला प्रहरी कार्यालय सल्यानका सूचना अधिकारी अर्जुन पौडेलले बताए ।

उनका अनुसार यमलाल जैसीको पसलबाट ५ हजार नगद,भारती कुमारी बिकको घरबाट १२ हजार नगद, दिनेश बुढाथोकीको मोबाइल पसलबाट ४० हजार बराबरको तीन थान मोबाइल चोरेर लगेका छन् । सामूहिक रुपमा आठ पसल, मेडिकल र व्यक्तिको घरमा चोरी गरेको समूहले स्थानीय भानुभक्त माविको तालासमेत फोरेको उनले जानकारी गराए ।

चाडपर्वको समयमा जुवा खेल्नेहरुले पसल तथा व्यक्तिका घरमा चोरी गरेको हुनसक्ने भन्दै घटनाबारे प्रहरीले अनुसन्धान बढाएको जनाएको छ ।
प्रहरी निरीक्षक पौडेलका अनुसार अहिले घटनास्थलमा सादा पोसाकमा प्रहरी परिचालन गरिएको छ । संकास्पद व्यक्तिलाई सोधपुछको कामसमेत भइरहेको उनले बताए । यस्तै बागचौर नगरपालिका –८ मा रहेको कालिका माध्यमिक विद्यालयमा पनि अज्ञात समूहले चोरी गरेको छ ।

तपाईको प्रतिक्रिया

सम्बन्धित समाचार